Sekilas Puisi Arach Djamali

BABBAR MANDHIRA

Dha’ Kacong Cebbing se Mangkada
Ja’ aggi’ sedha badhi mangkada
Dinggallagi aba’ alero’ e lencak
Arapa me’ kodu mangkat ?
Arentenga “kalong mosteka” ?
Arengrenga “kejung pornama” ?
Mangkat cong ! Mangkat bing !
Jarumattagi jagat
Rantep temor bara’
Tandhengngagi angen barat
Badhi sasemba’an dha’ jeng Ebu
Aba’ pessen tandha tresna
Pangonong ja’ duli dhuccol
Kerrap raja gi’ ngolkol
Sronen thokthok gi’ padha ngarak
Se nenggu gi’ ngremmet padha asorak
Horeeeee…….. horeeeee ………..
Se Kelap gabay gul-agul
Se Guntor gabay panambu
Se Meyang nonggul bunto’
Horeeeee ……. Horeeeee ……….
Se Jagir mleyot ka penggir
Kerrap raja gi’ ngamba’
Sronen yhokthok gi’ earak
Se nenggu gi’ aorak
Mangkat, babbar mandira
Du’ana emma’ gi’ ra-dhara
1990

BARAT

Barat kaballu namoy ka bume
Abatbat
Kabbi edhardhar daddi dhedhar
Kabbi eterrak daddi kerrak
Ongel se nyosop, locot
Cambur daddi babur
Se sokkla, serna
Se teron katon
Aba’ ta’; mongkat nadhung
Barat kaballu se asabung
Dhu aba’ !
Terrona agutonga lencak se reyot
Se taselpet e padduna dhapor
Eajuma neng mandhapa
Eajuma neng e roma
Aba’ ta’ mongkat nadhung
Barat kaballu se asabung
Dhu jagat
Terrona agutonga karena iman
Se nyaleke’ e gumbingnga dhadha
Ecangkengnga dhalem sokma
Ecangkengnga dhalem sossa
Ecangkengnga dhalem tresna
1991

SERRAT DHA’ JENG RAMA

Rama ,
pottra anyakse’e , ja’,
jeng rama ampon atareka, kabukten
Songennep so’ mekkar
manabi amarga
sumekar daddi langgadan
Arenggane para santana se ngamoddhi
ekembari samaramba para magar sare
rampak padha mapaka narekana Songennep sumekar
Kaoladan
sabingkerra kottha atabun kembang
manca barna, mera, biru, koneng, kalak,
acokkla’ glidhigan labang gappora,
saantaro batessa disa
Kaoladan,
lo-polona se nyarcar arenteng are moncar
aga’lir olle-ollang dhari settong ka settongnga,
nyambugel ngamba’ angen mapak omba’
padha akoba’ ngloskose beddhi e gir serengnga
Kaoladan ,
Pajuddhan se mesem e cellana ondhem
talangan Girpapas ngampar gumo’na ngapote-pote
Pagerrungan akocak ngarennyemma mennya’
Kangeyan apangka’ jate ban fosfat
Kaoladan
Salopeng Lombang ngangka’ pamor
Astatenggi Labang mesem salonodan
mamajir anondhan ngonjang pakon
sandhur juwak noro’ pato atengka’ lere.
Rama,
Songennep so’ mekkar,
nangeng …
aba’ rempek gan sasowet elanyo’ aros
ta’ kober arenggane mas enten kalong barleyan
dina badda’ maggun agincu dubbang
Rama …….., oladi Rama ………
.1992