Sekilas Puisi Arach Djamali

TOBAT

Aba’ faker, tekkor arta, tekkor teta,
Nangeng pekker gasek ngoker,
Pejer kadharuy ka barang baruy
Peyol kene’, eli-bali terros agili
Blumbang alet saomor-omor sajan apamor
Dhalem kobengnga kama’ seyadan
Dhu Guste,
Pamerte sonarra ate.
Paenga’agi’ ja’ aba’ gi’ andhi’ aba’
1992

PECCOT

Tharrr … tharrr … tharrr … monyena peccot
Asasendhin e bang-abang
Se Lajing Kombang adherres nangtang
Ngocer apara’ bar-galabar koneng
Se laen ceccer
Le’ Lerap atangdang meltas penjung
Tharrr …tharrr … tharrr …. Monyena peccot
Mederri gunong Pajuddhan
Si Mega Remmeng abu’ul bume nangtang
Dhempo Abang asor tapengsor etase’ tombet
Jeng Pottra meddet e sessellanna sokma
Tharrr … tharrr … tharrr … monyena peccot
Nyambugel e bai’ dhalem
Aba’ tatedhung, ale’ tatedhung
Kabbi tatedhung ekellone mempe
Setan Pote setan Celleng kaelangan le’er
Epeltas ka patandhan kamar petteng
Thar,
Peccodda potong
Komandinna elang
Thar.
10111997.

NGANTOS

dhar dher dhor agubek jagat
kaka’ mangkat asango tresna tor tekat
kemmes manes janji abali
erengrengnge nyrassa’ana bulan pornama
matabar le-olle salempang mera pote
pangkat opsir e bau kangan kacer
dhar dher dhor abit se lebbar
paras pacar senom the’-athe’
karena mantan anyar gi’ karabat
ngantor janji kemmes manes
se arengrengnge nyrassa’na bulan pornama
ale’ lako ngamba’ rarampadan malathe tompang
ame’-ame’ kaka’ kerrong
se eantos ta’ kadhik ngombar
ta’ papessen ta’ pakabar
me’ kenneng daddi panglepor
pajina tresna se la nyosop e sokma
dhar dher dhor gante nang nenong nong
se eantos ta’ kadhik ngombar
sumenep, 30081997