Puisi Madura: Abdul Gani

E ADHA’NA KACA

Tang mata ta’bisa akedep
akantha badha beddhi se nongka
maleddu’ tamba’na aeng mata
pellessa terbas ka dhalem ate
ta’ elang maske ekambang
ka aeng pangalaman ba’-lamba’na
naleka etenggu e kaca
e te-poteyanna mata
badha songay dhara ban tompo’anna tolang
e pengirra ajarjar mayyit se gi’ ta’ sempat e bendhem
tape e leng-cellengnganna
badha apoyya Ke Moko
ngobur kalamon elek-colek gan ne’-sakone’
ta’ mate sampe’ sateya
maske la eangguy nera’e parjalanan
antara Pamekkasan Kangeyan

Beddhi e dhalem mata
ta’ kera bisa etemmo
kajaba ajam adina korongga
ngabber noro’ onggana okossa dupa

E PALABBUWAN

Kapal se ekabarragi mowa’ dhara
ta’ bisa duli alabbu
karana kapal maju satendak
palabbuwan nyorot satendak
lebbi dhari sapolo taon se kadhuwa aruddhat
noro’ gumbagga omba’ kene’ se ta’busen nabbu terbang
daga ngambang pellona jaragan
mekkere oreng se ngantos e tangga’
ta’ laten
karana e roma sake’ la-balana
bakal aberseyan leng-cellengnga atena
ebukka’a essena tabu’na
ma’ olle bisa noro’ patona oreng
sabagiyan badha se abanto ngerem sampan pologan
tape dhu sarapa’a kowadda
kalamon ebandhingngagi moso kapal
padha kabater
tako’ sangona para pondhu padha tadha’
karana balanja se biyasa etarema
sateya gi’ ta’ gajiyan