Puisi Madura: Abdul Gani

E SETTONG BAKTO NALEKA MOSEM OJAN

Mosem nemor kara se saabidda ngorong
moga sateya dhapa’a ka konco’na
karana maske gi’ ekoca’ se’-rese’
ojan la tao rassana toron

Naleka tang ate badha e saba
arassa la cokop
kalaban kayakenan padhana bato
bibit molae etabur
aherra bines se eparatene
lengsang terro ceppedda dhapa’ ka saba

Asango duwana tang eppa’
ban pello se tamba are tamba accen
bines se molae abaludu’
etale’e pas epekol ka saba
tape naleka dhapa’ ka tapak dhangdhang
badha nyae mesem pas ngoca’ :

Cong, sabana ba’na
gi’ buru mare epagadhi.

ECAPO’ LEMPE’ ALES

Koduna sengko’ ta’ nangese nang-konang se buru
e langnge’ ajuta’an bintang etabur soro pele
sabab sala settongnga badha se pantes ka sengko’
bila endha’ sabbar
bulan pornama raja sakejja’aggi’ bakal moncar
dhari temor

Agantena seyang pas daddi malem
banne aobana tera’ daddi gu-onggu calemot
tape e dhalem tabu’na malem
badha tanang se pajat ejuluwagi
badha sagara se tadha’ penggir serengnga
badha kebbun anggur se lebba’ buwana
sapa se ngakan ka buwana
bakal mabu’ ban taobbar badanna
ka apoy papanggin
bakal tao manessa aba’ atemmo kakasena

Kalamon mekker gu-onggu ka sake’na elempe’ ales
e dhissa’ badha rassa
se ta’kera mare kalamon etoles ngangguy mangsen
bakal aoba daddi nyaman