Puisi Madura: Abdul Gani

MATORON NYEYOR

Ding la dhapa’ ka patowa’anna nyeyor
tang taretan padha asaor mano’
naleka sengko’ abala
ja’ nyeyor geddhing e taneyan epatorona
maske ta’ ekoca’agi
dhari basana mata tang ale’ kabbi
padha terro ka kakanan

Andha epanyandhar ka bungkana nyeyor
sala ollena ngenjam gi’ katon rentek
tape bila tangabas ka buwana se katon kerreng
rassa kabater agante pangaterro se raja

Naleka dhapa’ ka attas
buwa se katon celleng dhari baba
coma galunthongan se la mare elobange ebbu’
daksakala andha se ekatengga’i karethe’an
duli sengko’ entar ngolok tang embu’ ka dhapor
e babana nyeyor soro berri’ kasor se kandel

NETE OBU’ SALAMBAR

Sabellunna sengko’ eedini mangkat
sengko’ ta’ loppa nyeyom tanangnga Ba’na gallu
sambi amet bakal ngasteteya
dhalem carok se ta’ bisa epaburung
ja’ kobater
jimat se eberri’ Ba’na ta’ kera ebukka’
sengko’ ta’endha’ kadaddiyan lamba’
naleka Eppa’ ban Embu’ padha tato
karana ngenthengngagi moso
loppa ka jimadda
tape sengko’ ana’na
abassagi tabungnga

E alas raja
sateya sengko’ tatemmo
tenggina kadikdajan
padha gante jajak
maske moso akantha olar raja
ta’ kera bisa nyedding tang kole’
saabidda jimat gi’ paggun cekka’
saabidda sengko’ enga’
ka bauna tanangnga Ba’na