Puisi Madura: Abdul Gani

T A H A J J U T

Bume ebundu’ ngangguy seppe ban pettengnga malem
ta’ daddi alangan kaangguy mokka’ kalambina
karana dhalem abangkangnga
nakso ongga ka cethak
sengko’ terro buwana dhari atellagga
kalaban bannya’ mata
dhalem kandhunganna bakal rembi’ babaji’ se gi’ ngacernang
malathe agulu’ dhari mata
kalamon eseba’ aesse kowe lapes
tape dhalem kameskenan
cethak edhalay e tana
rata sampe’ tadha’ bates se paleng maba
ta’ pantes eatorragi ka Ba’na
karana barang se eatorragi tadha’ gunana
coma kata’bisa’an mokka’ kanceng
terro ebukka’agiya

TOLANG

Sowarana tembang Kasmaran e batessa disa
ta’ manyeddha’an tedhung
akantha badha besse baranena
tang soko esergu’ kaangguy alangka
ka bengko se badha oreng nembangnga

Naleka sengko’ mabangal
nokthok labang tello kale
tembang ta’ ambu
labang re-lere abukka’
sakaleng adha’ alonca’ serro kene’
karana oreng se paggun nembang
robana padha moso oreng se nemmo
tolang roso’na sengko’ se elang

Kabangalan aherra mergi’ daddi tombuna tanya
ba’ bendherra panyangka’anna sengko’
kalaban ta’ ngorangge ranyengga tembangnga
oreng se esangka nemmo tolang
mesem pas mokka’ kamarra
e geddhungnga agarantongan tolang roso’
dhari dhalem kamarra bathowangan bauna mayyit
ban nanana oreng se ngenom raconna